UN AIR DE DUCASSE

​

Comme il avoit roblié de r'prinde es n'haleine

El camarade Firmin avoit defunqué sans meime dire amen.

Comme i n'avoit jamée féet d'tort à quéequ'un

Ni même manqué d'respect envers es prochain

(Que du contraire, il avoit toudi rindu service)

Il avoit déquité l’terre ergretté pa tous ses amisses.

Eyé lé v’là d’vant l’huche du paradis in train d’bucquer hardimint

pou r’clamer s'biyet d'log'mint.

 

C'est vrée qu'on n’avoit nié enne fiane à li r'procher,

Foc qu’enne petite surlute, chaque année,

El jour dé ducasse. Faut dire qué s’grande passion

C’étoit d'féer el diâpe au combat dit Lum'con.

C’qui féet qu’ pinsant li ette agréâpe,

Es famille l’avoit rinterré dans s'pus biau costume de diâpe.

 

C'qué l’grand Saint Pierre n'avoit nié manqué d'ermarquer :

D'aousque vos v'nez ainsi infagoté ? qu'i li a d'mandé

In saquant les poyes dé s'barbe èyé l’ravisant dé haut.

Mi, èj suis d’Mon, né natif des Caches, tout c’qu’il a d’pus cayau.

Oh oh ! V'la bé enne monvéese arcommandation, etti St-PIerre

Passqué mi, jé n’d’ai jamée vu iun intrer autepart qu’in infier.

 

In pus dé ça, vos avez féet l’diâpe pindant trinte ans !

Pou mi, c’est co ça l’ pu z’imbétant.

Passqué, compreinez mé, qu’i li a co dit,

Jé n’peux quante-meime nié fée intrer l’diâpe au paradis !

Pinsez bé qu’ça f’’roit enne réede margaye !

Si l’Bon Dieu apprind ça, i va m’invouyer, à gailles.

 

Ouais mé, argardez mes certificats èyé mes états d’service,

Nié enne armarque, nié enne monvéese avisse !

Ça, c’est l’vérité vrée, erprit St Pierre. Bon, s’il a moyé d’vos fèere plési.

N’bougez nié d é d’là, èj m’in va Li parler intré quat’ zies.

Eyé St-Pierre, lèyant là no Camerluche

S’in r’va in roubliant d’erfrumer l’huche.

 

C’qu’i féet qu’Minmin poussé pa l’curiosité

N’a nié su s’impêcher d’rintrer pou visiter

Hou mais, pa’ tous côtés on intindit des esclamures :

Monh ! Argardez, II a ein sale diâpe dins nos murs !

Hein ouais ! Il est co pus laid qué l’ péché mortel, c’ti-ci !

Hou ! rwez le à l’huche, on n’a nié danger d’ça douci !

 

« Dé qué, etti Saint-Pierre in s’artournant, in vlà n’ bonne !

Ej’li dis d’rester là, èyé le v’là qui rintre, em n’homme

In foutant ein randouillage du diâpe chez l’Bon Dieu !

Nom dé z’os, ousqué vos dallez, rév’nez, m’fieu ?

Vos z’allez m’féer perde em place ! »

Mé bah ouaitte ! Autant péter dins n’contrebasse !

L’aute étoit d’jà long, s’pourménant tout à s’coyette

 

C’in est ieune, s’disoit Saint-pierre, in grattant s’tiètte,

Commint c’qué j’vas l’avoir dehors ? Douci, i n’a nié d’police.

Ah mais, in vlà ieune d’idée qu’elle est bonne. Attinds, m’ n’amisse !

Là-d’zeur, I s’in va quère Ste Cécile, èyé tous les séraphins

Puis il inmeine tout el clique dehors, su l’grand qu’min,

In preinant bé soin d’lèyer l’huche du paradis grande ouvrie.

Eyé, i s’mettent à jouer l’air du doudou sans arléver leu vessie.

Naturellemint, tout l’monde a v’nu vîr qué nouvelle.

Minmin, intindant ça, es cœur n’a féet qu’ein tour dé manivelle !

« I n’vont quante meime nié féer el Lumeçon sans mi, el vrée Montois »

Eyé, sans busier pus long, i s’inqueurt du costé d’ousqu’el musique vénoit.

 

Ah Ah, vos vlà pris au cripiau, etti St-Pierre : C’caup-ci, pus d’histoire !

Eyé, d’ein grand randon, il l’invouye bouler au purgatoire.

 

Ess’ t’ainsi qu’Minmin qui s’croyoit malin

s’a fait prendre bièt’mint :

Comme ein lapin !

Comme ein lapin ?

Ben ouais, pau z’oreyes !...

Ah ouais ! Mais allez résister à enne musique pareye !

​

Philippe Yannart, d'après Myen Vanolande. Cabaret 2018